Тест режимида

Миллий гвардияга бир қатор ваколатлар берилмоқда

21.04.2022

Миллий гвардия ходимларига маиший шовқинга қарши кураш талабларини бузганлар, вояга етмаганларни тунги вақтда кўнгил очиш (дам олиш) жойларида бўлишига йўл қўйганлар, жамоат жойларида спиртли ичимликлар ичганлар ва бошқаларни жаримага тортиш ваколати берилмоқда.

Жумладан, Миллий гвардия органлари Маъмурий жавобгарлик тўғрисидаги кодекснинг қуйидаги моддалари бўйича ҳуқубузарликлар тўғрисидаги ишларни кўриб чиқишга ва жарима тариқасидаги маъмурий жазо чораларини қўллашга ҳақли эканлиги белгиланмоқда:

·         187-моддасининг биринчи қисми (Жамоат жойларида алкоголь махсулотини истеъмол қилиш);

·         188-модда (Вояга етмаган шахсни ғайриижтимоий хатти-ҳаракатларга жалб қилиш);

·         188−2-модда (Вояга етмаган шахснинг кўнгил очиш (дам олиш) жойларида тунги вақтда бўлишига йўл қўйиш);

·         192-модда (Маиший шовқинга қарши кураш талабларини бузиш) бўйича.

Шунингдек, Миллий гвардия органларининг мансабдор шахслари МжТКнинг 61, 183, 184−2, 184−3, 185, 185−1 (божхона тўғрисидаги қонунчиликни бузиш билан боғлиқ ҳуқуқбузарликлардан ташқари) 185−2, 185−3, 186-моддаларида, 187-модданинг иккинчи қисмида, 188−1, 188−3, 189, 189−1, 190, 191, 194−1, 195−1, 196 (Миллий гвардияга тегишли қисми бўйича) ва 210−1- моддаларида назарда тутилган маъмурий ҳуқубузарликларни аниқлаган тақдирда, маъмурий ҳуқуқбузарлик тўғрисида баённома тузади ва белгиланган тартибда судга кўриб чиқиш учун юбориши белгиланмоқда.

Лойиҳа депутатлар томонидан биринчи ўқишда қабул қилинди.

Эслатиб ўтамиз, президентнинг 29 ноябрдаги фармонида Миллий гвардияга ички ишлар органлари билан бир қаторда жамоат тартибини муҳофаза қилиш соҳасида содир этилган маъмурий ҳуқуқбузарликлар тўғрисидаги ишларни кўриб чиқиш ваколатларини ҳам беришни назарда тутувчи қонун лойиҳасини ишлаб чиқиш топширилган эди.